கிளாம்பாக்கம் நடைமேம்பாலத்திற்காக மீண்டும் நிலம் கையகப்படுத்த நடவடிக்கை துவக்கம்

சென்னை, நவம்பர் 28:
கிளாம்பாக்கம் நடைமேம்பாலத் திட்டத்திற்குத் தேவையான 34,444 சதுர அடி நிலத்தை கையகப்படுத்தும் பணிகளை செங்கல்பட்டு மாவட்ட நிர்வாகம் மீண்டும் துவங்கி உள்ளது.

வண்டலூரை அடுத்த கிளாம்பாக்கத்தில் 40 ஏக்கர் பரப்பளவில் ₹400 கோடி செலவில் கட்டப்பட்ட புதிய பேருந்து நிலையம் கடந்த 2023 டிசம்பர் 30ஆம் தேதி திறக்கப்பட்டது. மெட்ரோ ரயில் சேவை இல்லை என்பதால், சென்னையின் பல பகுதிகளிலிருந்தும், வெளியூரிலிருந்தும் வருவோர் தங்கள் இலக்கை எட்ட மாநகரப் பேருந்துகளை மட்டுமே நம்பி இருக்க வேண்டிய நிலை தொடர்கிறது.

புதிய ரயில் நிலையம் அமைக்கப்படுகிறது

இதனை கருத்தில் கொண்டு, ஊரப்பாக்கம் – வண்டலூர் இடையே மின்சார ரயில்கள் நின்று செல்லும் வகையில், கிளாம்பாக்கத்தில் புதிய புறநகர் ரயில் நிலையம் அமைக்கும் பணி நடைபெற்று வருகிறது.

₹74 கோடியில் 1,310 மீட்டர் நீள நடைமேம்பாலம்

ரயில் நிலையத்தையும் பேருந்து நிலையத்தையும் நேரடி இணைப்பில் இணைக்க, 1,310 மீட்டர் நீளத்தில் ₹74 கோடி மதிப்பில் நடைமேம்பாலம் அமைக்கும் பணி கடந்த ஆண்டு துவங்கியது. இதற்காக ரயில் நிலையம் மற்றும் GST ரோடு இடையே 1 ஏக்கர் 45 சென்ட் நிலம் கையகப்படுத்த மாவட்ட நிர்வாகம் அறிவிப்பு வெளியிட்டது.

நீதிமன்ற வழக்கு – அறிவிப்பு ரத்து

இந்த அறிவிப்பை எதிர்த்து தி.மு.க. எம்.பி. ஜெகத்ரட்சகன் மற்றும் அவரது குடும்பத்தினர் உயர்நீதிமன்றத்தில் வழக்கு தொடர்ந்தனர். விசாரணை முடிவில், அந்த நிலம் கையகப்படுத்தும் அறிவிப்பை உயர்நீதிமன்றம் ரத்து செய்தது. ஆனால், புதிய அறிவிப்பு வெளியிட்டு நடவடிக்கையை மேற்கொள்ள அரசு முடியும் என்றும் நீதிமன்றம் தெரிவித்தது.

புதிய அறிவிப்புடன் மீண்டும் கையகப்படுத்தல் துவக்கம்

உயர்நீதிமன்றத்தின் கருத்து அடிப்படையில், செங்கல்பட்டு மாவட்ட நிர்வாகம் தற்போது 34,444 சதுர அடி நிலத்தை கையகப்படுத்த புதிய அறிவிப்பை வெளியிட்டுள்ளது.

இதுகுறித்து, நில உரிமையாளர்களுக்கு ஆட்சேபனை ஏதும் இருந்தால் தெரிவிக்கலாம் என்றும் மாவட்ட நிர்வாகம் அறிவித்துள்ளது.